Падрыхтаваная ў год святкавання 135-годдзя з дня нараджэння народнага паэта Беларусі энцыклапедыя «Янка Купала» асвятляе жыццёвы і творчы шлях класіка беларускай літаратуры, аналізуе ўсе яго паэтычныя, празаічныя, публіцыстычныя, драматургічныя творы, іх змест, літаратурна-мастацкія якасці, умовы падрыхтоўкі, распавядае аб краінах і гарадах, якія наведваў Янка Купала, уключае біяграфіі людзей, з якімі ён быў звязаны пры жыцці ці якія аказалі ўплыў на яго творчасць. Раскрываецца вобраз народнага песняра ў беларускім кіна- і тэатральным мастацтве, жывапісе, літаратуры. Выданне будзе карысным для ўсіх, хто цікавіцца гісторыяй беларускай літаратуры і культуры.

Падрыхтаваная ў год святкавання 500-годдзя беларускага і ўсходне-славянскага кнігадрукавання персанальная энцыклапедыя «Францыск Скарына» асвятляе жыццё і творчасць беларускага і ўсходнеславянскага першадрукара, асветніка Францыска Скарыны. Энцыклапедыя раскрывае шматгранны жыццёвы і творчы шлях Ф.Скарыны, аналізуе ўсе яго кнігі, іх змест, умовы падрыхтоўкі і мастацкае аздабленне, распавядае аб краінах і гарадах, з якімі быў звязаны беларускі асветнік, дае біяграфіі людзей, з якімі Ф.Скарына быў звязаны пры жыцці ці якія аказалі ўплыў на яго кнігавыдавецкую дзейнасць, а таксама паслядоўнікаў першадрукара ў выдавецкай справе. Раскрываецца вобраз Ф.Скарыны ў беларускім кіна- і тэатральным мастацтве, жывапісе, літаратуры. Выданне будзе карысным для ўсіх, хто цікавіцца гісторыяй і культурай Беларусі.

Выданне знаёміць з творчасцю беларускага мастака, нацыянальнага генія, майстра імпрэсіяністычнага пейзажу, чалавека з унікальным талентам тонкага лірыка Вітольда Каятанавіча Бялыніцкага-Бірулі (1872–1957). Жывапісец меў яскравую творчую індывідуальнасць, дасканала валодаў своеасаблівай мастацкай мовай. Вымушаны з розных абставін жыць і працаваць у Расіі, ён да апошняй хвіліны душой і думкамі вяртаўся да сваёй малой Радзімы, якая ўзгадавала яго і вывела на сусветна вядомую сцяжыну мастацтва. Ён пісаў: “У кожнага чалавека ёсць радзіма. Яна жыве ў сэрцы, у думках. Можна разлюбіць нявесту, жонку, але разлюбіць радзіму – жахліва, немагчыма… Была вясна. Я хадзіў па роднай беларускай зямлі. Я быў шчаслівы…”. Асабліва падабалася Вітольду Каятанавічу, калі ён адзін, сам з сабою, хадзіў на паляванне, блукаў па бясконцых палетках і пералесках з фарбамі і са стрэльбай. У маўклівых назіраннях вечара, сутоння, золаку ён падоўгу слухаў цішыню і сваё сэрца, якое ўсхвалявана білася ў грудзях… Для яго гукі былі размовай, якая то заціхала, то раптам зноў ажывала, у якой былі і пачуццё, і думка. “Маё жыццё з маленства паяднана з прыродай. У ёй і з ёю для мяне заўсёды быў сэнс жыцця. Я вырас у вёсцы, у прыродзе, у народзе”, – прыгадваў пад канец жыцця славуты беларускі мастак. Альбом “Я хадзіў па роднай беларускай зямлі. Я быў шчаслівы…” – своеасаблівая спроба праз творы мастака і лірычныя замалёўкі, што прадстаўлены вершамі беларускіх і рускіх паэтаў, а таксама праз успаміны Бялыніцкага-Бірулі спасцігнуць унутраны свет слыннага беларускага майстра. Выданне будзе цікавым шырокаму колу чытачоў, якія захапляюцца мастацтвам Беларусі.

У кнізе ў папулярнай форме апавядаецца пра жыццёвы шлях, літаратурную nворчасць і дзейнасць па пашырэнні ведаў сярод простых людзей трох выдатных пісьменнікаў 19 стагоддзя, якія жылі на беларускіх землях, — Вінцэнта Дуніна- Марцінкевіча (1808—1884), Уладзіслава Сыракомлі (1823—1862) і Вінцэся Каратынскага (1831—1891). Кніга прызначана для навучэнцаў і выкладчыкаў, а таксама для ўсіх, хто цікавіцца гісторыка-культурнай спадчынай беларускага народа.

Предлагаем юному читателю познакомиться с дружелюбным черноголовым щеглом. В 2018 году по решению общественной организации «Ахова птушак Бацькаўшчыны» он был объявлен птицей года. Как выглядит черноголовый щегол, где живёт, с кем дружит и как поёт, — на эти и многие другие вопросы маленькие читатели смогут найти ответы в этой книге.

Кніга распавядае пра жыццёвы шлях славутых асветнікаў-друкароў Івана Фёдарава, Пятра Мсціслаўца і Спірыдона Собаля. Іван Фёдараў выпусціў у свет грунтоўныя кнігі, што значна спрыялі пашырэнню асветы і развіццю духоўнай культуры трох усходнеславянскіх народаў: беларусаў, украінцаў і рускіх. Пётр Мсціславец на працягу многіх гадоў аддаваў свае жыццёвыя сілы і веды на карысць асветы і адукацыі простых людзей. Па сутнасці, менавіта ён адрадзіў і працягнуў справу Францыска Скарыны і нават узбагаціў закладзеныя ім традыцыі кнігадрукавання. Годны прадаўжальнік кнігавыдавецкай справы Спірыдон Собаль быў таленавітым друкаром-прадпрымальнікам, паколькі ў розных мясцінах ствараў прыватныя друкарні, выдаваў у іх кнігі рэлігійнай і адукацыйна-выхаваўчай тэматыкі, а затым спрыяў іх папулярызацыі і распаўсюджванню. Матэрыял у кнізе пабудаваны на фактах, чытэльны i багата аздоблены iлюстрацыямi. Чытач убачыць рэпрадукцыi карцiн, копii дакументаў, сучасныя фотаздымкi i выявы тых жа месцаў на старых паштоўках. Аўтар кнігі “Іван Фёдараў, Пётр Мсціславец, Спірыдон Собаль” стварыў iнтэрактыўную прастору, якая дазваляе знаёмiцца з гiстарычнымi асобамi, адчуваючы каларыт XVI – XVII стагоддзяў. I зрабiць гэта будзе цiкава не толькi школьнiку i настаўнiку, але і кожнаму, хто цікавіцца гісторыка-культурнай спадчынай беларускага народа.

Рух жыцця выклікае і рух мовы, падчас якога адны словы выходзяць з ужытку, але з’яўляюцца і новыя. Гэтым словам, якія яшчэ называюць гістарызмамі, архаізмамі і неалагізмамі і прысвечана кніга. На старонках выдання кемлівыя чытачы знойдуць адказы на пытанні, чаму старэюць словы і з якой прычыны ўзнікаюць новыя, якія словы называюцца ўстарэлымі і якой спецыяльнай паметай яны суправаджаюцца ў слоўніках, хто такі лексіколаг, якія адзінкі мер аб’ёму сыпкіх і вадкіх рэчываў, даўжыні і адлегласці, вымярэння зямельнай плошчы існавалі ў нашай краіне раней і з цягам часу сышлі ў нябыт, і іншыя. Акрамя тэарэтычнай часткі, напісанай цікавай, зразумелай для дзіцяці мовай, у кнізе змешчаны займальныя заданні, сярод якіх гістарычныя задачы і шыфраграмы. Яркія каляровыя ілюстрацыі зробяць падарожжа ў свет мовы яшчэ больш цікавым. Выданне будзе асабліва карысным для школьнікаў малодшага ўзросту.

Энцыклапедыя «Гарады і вёскі Беларусі» – шматтомнае выданне, у якім адлюстраваны гісторыі і сучасны эканамічны і культурны стан усіх адміністрацыйна-тэрытарыяльных адзінак Беларусі. Дзясяты том энцыклапедыі ўключае каля 2 тысяч артыкулаў, прысвечаных Віцебску і ўсім населеным пунктам Аршанскага, Бешанковіцкага, Браслаўскага, Верхнядзвінскага раёнаў – як сучасных, так і тых, што зніклі ў выніку сацыяльна-эканамічных змен і працэсаў урбанізацыі. Разам з гісторыяй вёсак, пасёлкаў і гарадоў тут прыводзяцца звесткі аб помніках гісторыі і культуры, прозвішчы людзей – ураджэнцаў гэтых мясцін, што вызначыліся ў гісторыі беларускай дзяржавы, пакінулі значны след у сусветнай культурнай спадчыне. Унікальнасць і значнасць кнігі ў тым, што яна паказвае незалежную Беларускую дзяржаву праз прызму тых “цаглінак”, якія яе складаюць – праз летапісы простых вёсак, ад часу іх першай згадкі ў пісьмовых крыніцах да нашых дзён. Тут жылі і цяпер жывуць грамадзяне краіны, якія сваім жыццём увасабляюць яе гісторыю. Гэтым кніга набывае патрыятычны сэнс і дапамагае выхоўваць у моладзі павагу да спадчыны сваёй краіны. Выданне багата ілюстравана. Яго рукапісы рыхтаваліся калектывам аўтараў – навуковымі супрацоўнікамі Інстытута мастацтвазнаўства, этнаграфіі і фальклору Цэнтра даследаванняў беларускай культуры, мовы і літаратуры Нацыянальнай акадэміі навук Беларусіі і з’яўляюцца вынікам іх шматгадовай працы ў бібліятэках і архівах Беларусі, Расіі, Літвы, Украіны і Польшчы.